ភ្នំពេញ៖ នៅព្រឹកថ្ងៃទី២៩ ខែធ្នូ ឆ្នាំ២០២៤ ឯកឧត្ដម គឹម ចាន់សំណាង ប្រធាន ស.ស.យ.ក នៃសភាសម្ព័ន្ធសហជីពជាតិកម្ពុជា បានរៀបចំចែកសម្ភារៈ ចានស្រាក់ ដបទឹកក្ដៅ និងម៉ាស ជូនថ្នាក់ដឹកនាំសហជីពមូលដ្ឋាននៃសមាជិកសហព័ន្ធសហជីព របស់សហភាពសហជីពសុភមង្គលកម្មករកម្ពុជា ចំនួន ៥៧នាក់ ដែលមកពី ១៩ រោងចក្រ-សហគ្រាស នៅទីស្នាក់ការកណ្ដាលរបស់ NACC ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ។

ការចែកជូនសម្ភារៈទាំងនេះ មានការចូលរួមពី ឯកឧត្ដម សួង ហួត ទីប្រឹក្សាជាន់ខ្ពស់សភាសម្ព័ន្ធសហជីពជាតិកម្ពុជា, ឯកឧត្តម លី វិចិត្រ អនុប្រធានសភាសម្ព័ន្ធសហជីពជាតិកម្ពុជា​ និងជាប្រធានសហភាពសហជីពសុភមង្គលកម្មករកម្ពុជា និងបងប្អូនថ្នាក់ដឹកនាំសហជីពមូលដ្ឋានទាំង១៩រោងចក្រ-សហគ្រាស។

នាក្នុងឱកាសនោះ ឯកឧត្ដម គឹម ចាន់សំណាង ក៏បានលើកឡើងថា សម្ភារៈទាំងនេះគឺជាជំនួយដ៏ថ្លៃថ្លារបស់សហជីពទូទាំងប្រទេសចិន ផ្ដល់ជូនដល់ សភាសម្ព័ន្ធសហជីពជាតិកម្ពុជា-NACC សម្រាប់ចែកជូនដល់បងប្អូន។ ការចែកជូនចានស្រាក់ ដបទឹកក្ដៅ និងម៉ាស នេះ គឺជាសកម្មភាពមួយ ដែល NACC តែងតែផ្សាភ្ជាប់ក្នុងការលើកកំពស់បរិស្ថានស្អាត ការកាត់បន្ថយការប្រើប្រាស់ថង់ប្លាស្ទិក និងលើកកំពស់ដល់សុខភាពក្នុងកន្លែងការងារ និងការរស់នៅរបស់បងប្អូនកម្មករ៕